政壇：同宗鬧爆貪曾 冷待有機耕種
過往香港漁農業發展被指缺乏可持續性，又係「貪曾」前特首曾蔭權爵士遺禍！香港有機農業生態研究協會總幹事曾贊安爆料，協會自○三年創辦以來，每年出版年度報告，都會邀請當時特首題詞，今屆特首梁振英都已經應承咗，但貪曾前特首曾蔭權爵士任內多次以事忙為由拒絕，佢自言同貪曾都係姓曾，對此都感到好無面喎。
黃容根展示有機農作物。
曾贊安講起貪曾就火滾。
貪曾任內乜都唔做等收工，連有機耕種都唔支持，曾贊安講到同姓三分親嘅貪曾都無面畀。不過，立法會前漁農界議員「肥根」黃容根就好有心嘞，因為佢答應喺今年四月接替溫麗有，出任香港有機認證中心主席，任期四年，據聞佢之後會到內地巡迴參觀已獲中心認證嘅基地。曾贊安大讚肥根係「中港通」，希望未來做多啲同養生有關嘅中藥材認證工作。
其實，曾贊安本人都多才多藝，曾出任演員多年，其中最著名角色係喺劇中扮演包公身邊嘅王朝，之後又曾經用前後十七年時間，去完成修讀同農業有關學位同博士學位。
