政壇：大輝龐愛蘭拒嫁做散人
各級選舉下年陸續舉行，為咗整合力量，唔同政黨政團都開始思考未來去向。其中由葉劉淑儀做主席嘅新民黨就同新界東政團公民力量「談婚論嫁」，傾到差唔多埋牙喇，嚟緊嘅星期三仲會正式舉行「結盟」記者會添！之不過，現時係公民力量成員嘅立法會議員林大輝，同埋沙田區議員Scarlett龐愛蘭就「唔肯嫁」，唔通係傾唔掂禮金畀幾多？
設計圖片及對白
田北辰有望選超級區會
新民黨今個月二十二號就係三周年黨慶，今個星期三、即係十日前就率先可以沖喜。據知當日嘅「結盟」記者會，會正式公布雙方會互相成為對方成員，即係掛住兩頂帽，立法會議事層面用新民黨嘅名，地區事務就兩個政團名都用。
但係「成婚」一事最後都係唔齊人，皆因大輝同Scarlett決定唔「過門」。原來Scarlett兩年前喺新東，同建仔鷸蚌相爭敗北後，仍然對立法會議席念念不忘，所以繼續做自由身，先有機會出選；至於做開無腳雀仔嘅大輝「拒嫁」，就因為始終同新民黨理念唔太近，費事用佢哋牌頭，似乎都係做住「散人」啱啲。
政治嫁娶往往意味住利益交換，對於新民黨，繼港島同新西後，增加多一區樁腳，對於現任新界西立法會議員、同時係荃灣區議員嘅田北辰嚟講，就有機會參選超級區議會。現時較為代表中產嘅建制超級議員只係得建仔李慧琼，佢加入就有機會爭取第三席，而新西直選議員就可以讓畀第二梯隊上位，而有意參選特首嘅葉劉淑儀亦可增加樁腳；公民力量自從前立會議員劉江華當官後，繼任人都冇乜野心，缺乏精神領袖，雙方結盟後起碼重燃中興嘅希望，正正係互惠互利。
