一日三餐樣樣毒 油鹽醬醋統統假
禍從口出人人識講，但禍從口入未必個個都知。中港關係愈來愈密切，本港大部分食品食材由內地入口，弊在黑心食品已經成為「神州第一品牌」，市民避無可避。如果中咗招仲矇查查，咁就該煨咯。
北上消費係港人假期主要節目之一，不過，除咗PM2.5爆燈嘅污濁空氣攞命，一日三餐同樣潛藏危機，黑心食品「梗有一樣喺左近」。睇下以下「餐單」，就知咩叫防不勝防嘞。
豆漿加饅頭係早餐最平民化嘅選擇，好味飽肚兼抵食。不過一個唔好彩，美味早餐可能變「化學早餐」。內地攤販最擅長使用豆漿香精溝水再加少量豆漿，甚至加埋甜味素等混合製作「豆漿」；上海多家超市賣嘅饅頭，為咗賣相更「健康」，居然加入色素染色。日日食埋呢啲早餐，唔損害腎臟至奇。轉食港人至愛嘅煎蛋加鮮奶，一樣有風險！隨時會食到含氯化鈣、硬脂酸同石蠟嘅假蛋，以及含三聚氰胺嘅毒奶，食完分分鐘作嘔、反胃同血壓飆升，問你驚未！
午晚兩餐更牙煙，風險高到冇朋友。閣下可能品嘗到各類「中國特產」，包括用含鎘毒大米煮嘅白飯同米粉、用死豬肉做嘅各種菜餚，炆、煎、燉、炸、清蒸、紅燒樣樣齊，仲有抗生素「速成雞」、「垃圾肥青菜」、「孔雀石綠魚」同「牛肉膏牛肉」等等，開番圍「黑心食品滿漢全席」，足夠有餘。
唔食炒餸，打邊爐得嘞啩？仲大鑊，內地近年頻頻揭發出令人毛骨悚然嘅毒火鍋醜聞，除咗用食剩湯底加水炮製嘅「口水火鍋」，仲有用植物萃取油加香精合成，含致癌物質嘅「一滴香」溝出嚟嘅各式「上湯火鍋」。最得人驚嘅，就係用狐狸肉或鴨肉加色素同香精炮製嘅「假羊肉」，直頭聽到都反胃喇。
內地官場腐敗，無良奸商同貪官互相勾結，食物安全監管形同虛設，黑心食品氾濫成災。港人北上固然要打醒十二分精神，防止中招，港府更要加強堵截同追查，將「毒」、「假」食品拒諸門外。千祈咪後知後覺，好似前排咁，含鎘大米流入本港市場都懵然不知。
講起真係心噏，中國已經成為全球第二大經濟體，可以將神舟送上天，將蛟龍送下海，連航母都話識做，唯獨生產唔出令百姓三餐食得放心嘅產品。「中國製造」家陣淪為「假冒偽劣」嘅代名詞，華夏美食同黑心食品畫上等號，計太一叮話齋，中共反貪污腐敗未夠，仲要反「毒」反「假」，唔係嘅話，一樣亡黨亡國嘅咋，叮！
