潮語「金魚腦」意思係話人好似金魚個腦咁，呢頭食完嘢，嗰頭就即刻唔記得，即係話人善忘。因為坊間流傳金魚嘅記憶只有三秒。不過呢樣嘢查實冇科學根據。點都好，「金魚腦」就係指一個人冇記性冇記憶，呢頭受苦，嗰頭就忘記。呢種到底係好事定壞事？冇人知！不過用嚟形容香港人就真係好啱，因為無論啲建制派政棍，同啲為選票咩都可以出賣嘅偽民主派做幾多壞事，香港人都即刻忘記，繼續喺嗰煲用慢火煲緊嘅水裏面，扮天真嘅青蛙。

呢幾年成日聽到人講「核心價值」，其實香港嘅核心價值到底係咩？呢個價值係指香港呢個城市定係香港人本身？香港人又係指咩人？本土香港人同新香港人嘅價值已經非常之唔同，而呢啲所謂核心價值又可唔可以Apply落其他香港居民？

不過講來講去講咗幾年，到底呢個核心價值係乜？一直冇人夠膽清楚界定。你話法治同自由呢啲係最核心，但可能樓下茶餐廳嗰班司機大佬話係搵食。你問民主黨嗰班友，佢可能答你係入閘選特首，其他咩民主原則都可以不理。所以，香港核心價值真係公說公有理！但你有一點可以肯定嘅係，香港人都真係「金魚腦」。呢頭鬧完TVB，嗰頭就即刻死死地氣走去為林峯打氣。骨氣？話之你！

「金魚腦」真係香港一樣重要嘅核心價值，令到管治香港變得容易。你睇政府，管治一塌糊塗，大集團地產商繼續屈機，你啲香港人依然好似條金魚咁，有蟲食就開心。再咁落去香港人唔係「金魚」，而係一條「死魚」。

第一手消息請下載on.cc東網iPhone/iPad/Android/Windows Phone Apps