政壇：搞搞政：鍾樹根練氣功「肯肯定」有好處
氣功可以強身健體，但立法會議員鍾樹根仲話可以正音添，練多啲，佢之前「肯肯定係有問題」嘅被指爆粗事件都可以避免喇！灣仔伊利沙伯體育館尋日舉行「世界氣功推廣日 早日認識氣功」活動啟動禮，樹根都有出席，佢話大半年前跟朋友搵玄武派第十四代傳人黃玄來道長（黃師傅）學氣功，練落就覺得好處多多。
設計圖片
樹根話鍛煉之後先明白人體入面係有一道氣場，練氣功係對身體有好處。好似佢自己咁，做咗咁耐議員，成日都要出街食飯應酬，搞到有尿酸問題，經常都會發作。以前佢都係啪兩粒西藥止痛，可謂治標不治本。但學氣功一個月左右，痛症問題就冇再復發，就算冇戒口都冇問題，真係神奇。樹根仲話，練氣功後佢鼻敏感情況都改善埋，呼吸都暢順咗好多，講嘢發音都正啲啦，咁就唔使怕再被人話佢講粗口喎！
黃師傅就話，唔少都市人都會有病痛，只要用心、用多啲時間練氣功係可以強身健體。佢又話任何人都可以產生氣感，練習時可以諗吓名山大川，只要放鬆就得喇。
