網上討論區瘋傳一段名為「AM車私用？」嘅短片，該片是網民去年十二月二十一日約下午一點所攝，有AM車公然喺銅鑼灣興發街嘅禁區兼郵車專用泊位停車等候兼上落客，車輛為「AM 726」，當時大模廝樣停咗喺附近幼稚園對出嘅郵車專用泊位，阻塞條路，其他司機響按都冇人理。營運幼稚園嘅東區區議會前主席丁毓珠（珠姐）捲入事件，片中仲有佢把聲話：「（郵車專用）個位係我嘅！」

的士司機駛經架AM車都忍唔住出手拍打車身三下，以示不滿。（互聯網圖片）

丁毓珠為維護區子君喺禁區上車，不惜將責任攬上身。

丁毓珠

現場係興發街往北角、柴灣方向，係通往紅隧、東隧嘅交匯處，閒日都相當繁忙，當日卻見政府車違泊，頭笠聖誕帽嘅珠姐護送抱住B女嘅東區民政事務助理專員區子君上AM車離開。上傳短片嘅網民當時駕車駛經珠姐面前都忍唔住炮轟：「邊個政府部門o架你？政府車嚟o架？」未有入鏡嘅珠姐就尷尬話：「唔係唔係，呢度係我個位嚟嘅！」

AM車違規停泊，點解珠姐要攬上身呢？佢解釋當日由佢任主席嘅銅鑼灣街坊福利促進會邀請區子君任聖誕遊藝會主禮嘉賓，但預留泊位滿咗，迫不得已先要區子君同B女喺禁區上車，佢強調架車只係停咗一陣，上完客即走，仲吐苦水話平日都有私家車喺嗰條街載小朋友返學放學。警方發言人回應會跟進有關個案。

第一手消息請下載on.cc東網iPhone/iPad/Android/Windows Phone Apps