援助計劃成效低 鼓勵就業大隻講

係咁嘅，社署去年初委託非政府機構推行為期廿七個月嘅「自力更生綜合就業援助計劃」，為受助人提供一站式就業支援。本來呢，鼓勵受助人自力更生脫離綜援網，無疑係一件好事，弊在當局做啲唔做啲，未能向參與計劃人士提供就業輔導，加上工作錯配情況普遍，受助人好難搵到啱自己嘅工作，令成效大打折扣。

嗱，截至去年十一月底，新申請並需參加計劃嘅個案共有一萬一千七百幾宗，結果成功就業嘅只得三千四百幾人，成功率不足三成，遠低於過往五年推出嘅其他計劃。唔少個案「呢頭轉出去，嗰頭又轉番入嚟」，最終能夠脫離綜援網嘅只得八百幾人，純粹得啖笑。

開講有話，授人以魚不如授人以漁。就業支援如果淨係提供職位，然後就關人個關，效果梗係大打折扣喇。好簡單，如果受助人以前一直從事餐飲業做開廚師嘅，家陣介紹佢去做保安，最低限度都要為佢提供基本輔導，畀佢了解少少物業管理知識啩。可惜吖．有關機構同受助人見面好似公立醫院輪街症咁，每次得半粒鐘，只能做職業配對，根本冇可能提供職業輔導。喺咁嘅情況下就業，難以適應不特止，分分鐘第一日返工就撞大板，點可能做得耐吖。

正所謂，送佛送到西，助人助到底，鼓勵綜援受助人自力更生，唔等於政府翹埋雙手乜都唔做。雖然話，部分申請人對工作可能比較揀擇，要求較多，但如果當局畀多啲心機，投放多啲資源，尤其喺職業輔導方面做多啲工夫，又何至於搞到唔湯唔水，成效不彰吖。

話時話，社署曾經針對唔同類型嘅綜援受助人，推行多個協助就業計劃，可惜成功率年年下跌，呢次整合各項計劃推出「自力更生綜合就業援助計劃」，係威係勢，點知成功率仲低過以前，證明有關計劃冇對症下藥，根本止唔到咳。

講到底，社會福利資源彌足珍貴，應該用嚟幫助最有需要嘅人，當局應該檢討吓問題到底出喺邊，諗辦法創造條件，鼓勵有能力嘅受助人自食其力。老實講吖，有手有腳、身壯力健嘅人唔肯搵嘢做，梗係有問題嘅，當局必須確保綜援用得其所，唔好浪費納稅人嘅金錢吖，叮！