SUN奇古怪：【普教中】Pou2 Gaau3 Zung1
如果你未聽過唔怪你，因為「普教中」係司奶界同教育界嘅潮語，同「教宗」、「較鐘」或任何宗教都無關。「普教中」只不過係「普通話教中文」嘅簡稱。
最近教育局喺佢網站，發表粵語唔係官方語言嘅言論，即刻全城鬧爆，同時亦引起社會好多關於粵語同普通話之間，邊個勁啲同地位高低嘅爭論。教育局唔掂就係人都知，加上「唔得掂」局長吳克儉亦係官員中民望包尾分子，你問佢粵語係乜佢都未必答到你，所以佢可能連坊間爭論緊咩都唔知。
話說回來，粵語係中國嶺南地區通用嘅語言，而普通話就係以前大清國嘅官話，係源自中國東北地區嘅語言，都唔係全中國識聽識講。大家都係漢語嘅一種，根本不必刻意分高低，但近來嘅爭論根本就唔係語言問題，而係政治問題。香港作為粵語文化嘅中堅，香港99%嘅人係講廣東話，喺香港強推普通話，難免令有啲人聯想，又係中共強迫中港融合嘅殖民手段。
教育局嘅言論企圖矮化粵語，亦有向北京獻媚之嫌。尤其係有啲學校推行「普教中」，根本就係無必要。淨係「普教中」呢三個字，已經相當大陸化，令好多人不知所云晒頭。
依家好多中小學都好興用普通話教中文，出發點講得好聽，就係可以學習到講和寫一致，因為廣東話同寫嘅白話文係有出入。有啲唔知學者、學究定學棍覺得，廣東話係寫唔到出嚟，唔係官方文字，「普教中」可以提升學童語文能力，所以依家好多司奶都想小朋友入到「普教中」嘅學校。
但係用母語廣東話學中文又有乜問題？用母語解釋古文同討論文學作品，唔係學得仲快咩？問題就係……粵語好快就唔係香港人嘅母語，只要繼續依家每日都進行緊嘅換血同清洗，喺不久嘅將來，新香港人嘅母語，根本就係普—通—話！
