SUN搞作：少膽虫手記︰過台灣甚艱難

淫賤黎反應唔嚟，估唔到忠心耿耿嘅奴才都作反，直至封信緩緩跌落地，先至呆呆咁問：「你唔係過檔人哋度做腦腫呀話？」

「腦細，同黑社會一樣，喺《爛果》做過，邊有得返轉頭？」少膽虫嫣然一笑：「我儲夠五百萬台幣，移民台灣退休喇！」淫賤黎非常震驚，大叫：「調你吖！我調你！我調你過台《爛》咪得囉！做乜唔撈呀！」

「唔啦！我諗住坐『元秋號遊輪』，環遊世界黐飲黐食之後再去台灣，你知啦，台灣少咁多爭拗，最多都係藍藍綠綠打吓交、啲錢拎去買過期軍火咁啫……」少膽虫娓娓道來，淫賤黎卻竟然聽到眼濕濕。

當少膽虫以為佢顧念賓主一場，一時感觸，淫賤黎突然又話：「少膽虫，你好嘢。你肯定應承咗投畀佢啦……」少膽虫聽到一頭霧水之際，淫賤黎突然拔出皮鞭。

「好呀，寧願畀元秋蹂躪都唔畀我蹂躪……」撞聾嘅淫賤黎向空中抽幾鞭，「你以為依家得嗰五百萬台幣就走到？要一千萬喇！服侍我多廿年先講啦！」