被嘲為「每周一鑊」嘅周一嶽自從接任平等機會委員會主席後，就連累平機會做咗風眼，真係「陀衰家」。周一鑊舊年十一月首次參加撐同志遊行，之後就畀明光社、家長團體等批評佢偏離主席嘅中立原則。號稱有三十萬名信徒嘅香港華人基督教聯會前日就登廣告，狠批周一鑊唔夠客觀中立，係「極端不適當及有違主席之身份」。

設計圖片及對白

平機會前晚要代周一鑊出聲明反駁，佢尋日朝早再接受電台電話訪問，點知仲係「死雞撐飯蓋」。佢話平機會嘅職責係為小眾發聲，並支持佢哋爭取應有嘅權利，所以參與遊行係正常，跟住仲反向對方開火，話教會雖然聲稱立場係唔歧視，但觀其工作、言行，似乎同呢個說法有所牴觸喎，睇嚟佢都「火力十足」。

周一鑊聲稱有好多教會朋友同牧師，事後都發電郵同打電話畀佢，話唔支持聯會呢個宣言。佢仲學人搞黑色幽默，話要公開多謝呢個廣告，因為好多人都唔知佢幫緊小眾喎。人哋登晒報紙鬧你都仲要講多謝，正一係唔鬧唔過癮，愈鬧就愈興奮，唔怪得之佢做食物及衞生局局長時，日日爆大鑊佢都仲笑得出喇！

第一手消息請下載on.cc東網iPhone/iPad/Android/Windows Phone Apps