政壇：名人積福 心中有「素」
香港三德弘法中心前晚舉辦新春祈福法會同千人素宴，好多政商界名人都去食齋積福，包括「翡翠皇后 」帝皇翡翠行政總裁董吳玲玲、中成藥商會主席Stanley黃楚恒同太太黃陳嘉妮，仲有Stanley嘅媽媽中華總商會婦委會副主席黃周娟娟等。
黃楚恒（中）同太太黃陳嘉妮（右）四年抱四，黃周娟娟抱孫抱到手軟。
見Stanley太太身懷六甲，細問之下，原來係佗住對孖胎，預產期喺六月。Stanley話，其中一個BB已知係囝囝，但另一個未知住，但係男係女都冇所謂，皆因今次係佢哋嘅第三胎，計埋呢對孖B，共有四位子女，而且係「四年抱四」添，唔怪得之當晚個個笑得咁開心。
轉頭見到神采飛揚嘅董吳玲玲，原來佢已卸任晋江同鄉會會長，同時榮升福建社團聯會永遠名譽主席，所以最近多咗時間陪家人及旅行，唔怪得咁精神。董太笑言自己天生係佛教徒，因為佢係觀音誕嗰日出世。董太又話，信佛唔一定要食齋，佢亦唔食長齋，但係生日當天一定會食，以示誠心。
當晚仁濟醫院總理吳志斌係當晚活動嘅統籌，所以請埋仁濟一班善心人士齊去護持今次活動，齊齊食素淨心積福。
