政壇：福建幫盼自己友做特首
在港擁有逾百萬鄉親嘅福建社團聯會，一向係建制派嘅重要票倉，喺各級選舉中足以左右結果。福建幫尋日舉行新春團拜，各建制派黨派阿頭、有意參選或角逐連任嘅議員，以至多名盛傳有意競逐下屆特首嘅疑似人選，幾忙都要抽空畀面撐場，場面墟冚。
林樹哲（右）力撐新主席吳良好。
聯會前主席林樹哲舊年交棒畀新主席吳良好後，刻意低調咗一排以便新主席接班，尋日佢終於現番身，盛讚吳良好有心、有力。吳良好話三月底至四月初，佢將會率領逾百名鄉親及聯會高層北上訪問，到北京及天津等城市交流。
現場消息稱，明年區議會將全面取消委任議席，有唔少政治人才嘅福建幫，亦有意派人競逐多出嘅直選議席，依家已開始展開工作。咁福建幫會支持邊班人做下屆特首選舉？林樹哲重申希望有朝一日，可以有福建人做到香港特首，依家會繼續努力。不過，坊間浮現嘅疑似特首人選，暫時都未見閩籍人士，福建幫咁講似乎係想吊高嚟賣，未肯咁早表態住囉！
