立法會議員Ann蔣麗芸因不滿參加咗嘅郵輪團「爛尾」，未能停泊越南下龍灣觀光，周三抵港後率領逾四百名團友留守郵輪逾十五小時，要求旅行社賠償多達七成團費，又再引起爭議。有網民揶揄阿Ann平日高舉反對「佔領中環」旗幟，自己遊埠就「旅霸」上身「佔領郵輪」，同樣以少數民意脅迫大多數團友意見，質疑佢先係佔中代言人。不過，佢嘅黨友就一如既往力撐佢，仲大讚外號「元秋」嘅佢，係名副其實嘅「女俠」而非「旅霸」添！

除咗網民鬧爆，有參與行程但冇留守抗爭嘅團友尋日亦打電話上電台，直言事件只係意外，對阿Ann等團友嘅行為感到「羞恥、醜怪」，認為船長已盡力嘗試泊岸，團友有不滿大可循正常途徑去消費者委員會投訴，點都唔應該「佔領郵輪」。阿Ann就解釋，若果佢係普通團友，可能一早已經落咗船，但身為為民請命嘅議員，又點可以不顧而去呢？佢又否認留守嘅團友係「旅霸」，強調事件唔可以同佔中相提並論。

經常坐郵輪嘅藝術發展局主席王英偉尋日出席一個新春活動時就話，一般遠洋郵輪設施都相當齊全，就算團友因意外落唔到船玩，相信船上都有足夠娛樂設施畀佢哋消磨時間，唔會「漂浮」海上冇嘢做。

同阿Ann同屬建制派嘅立會議員馬逢國話當時唔在場，好難講邊個啱邊個錯，但始終「霸住個地方唔係幾好」，假如佢喺船上，就會建議團友落船再向消委會追討喇！

第一手消息請下載on.cc東網iPhone/iPad/Android/Windows Phone Apps