政壇：汪阿姐同泛民開年
前身係油麻地戲院嘅粵劇戲曲中心，其擴建撥款申請因泛民主派議員不滿政府將露宿者之家興建喺垃圾站樓上、帶頭反對下令政府喺短短兩年間兩度「闖關」失敗，不但「煞停」油麻地戲院二期工程、露宿者之家亦被迫留守原址。難怪向來同政府關係良好嘅八和會館尋日舉行新春團拜，主席「阿姐」汪明荃致辭時，都忍唔住主動要求政府喺戲曲中心擴建撥款上要「快馬加鞭」，睇嚟佢今鋪飲熱咖啡都下唔到火。
設計圖片及對白
轟冇全盤考慮方案
雖然政務司司長林鄭月娥同民政事務局局長曾德成都有出席團拜，但講嘢向來直腸直肚嘅阿姐就老實不客氣，除公開大呻粵劇界嘅培訓空間不足，亦把握機會向我哋隔空不點名批評有份投反對票嘅泛民議員，指露宿者之家過去一直靠近垃圾站，搬新竇反而有更好嘅居住環境，仲話香港唔少民居，甚至千萬元豪宅隔籬都會有垃圾站，炮轟泛民議員冇全盤考慮方案。
同場仲有身兼八和會館法律顧問嘅民協主席「老虎仔」廖成利，前日先公布未來三年會開展「滅鼠行動」，爭取一六年排頭位出戰立法會九龍西硬撼「鼠王芬」梁美芬，估唔到佢尋日即時發威，趁林鄭同曾德成準備離開之際，即刻當住傳媒面前攞出兩張印有民協嘜頭、寫有「馬上普選」、「馬上擴建」嘅揮春，要求政府馬上處理戲曲中心擴建撥款兼普選咁話。
咪住！民協作為泛民黨派，唔係為露宿者出頭否決撥款咩？我哋翻查工務小組成員名單，發現代表民協嘅KK馮檢基唔係成員之一，KK以至民協究竟幫邊個就真係無從得知，希望唔係繼白鴿黨宣誓佔中後又一內訌藥引。
