淫師私隱受保障 學生安全官懶理

校園多淫師，唔係亂講o架。教育界統計發現，○六年至今總共發生逾百宗教師涉及風化案，當中近半數被定罪，包括偷拍裙底、非禮學生、與未成年人士發生性行為、孌童以及管有兒童色情物品等，當中約九成喺校園發生，而受害人就係涉案教師嘅學生。清淨校園淪為犯罪樂園，為人師表變咗為淫師表，家長唔驚就假咯。

更加得人驚嘅係，邊個係校園色狼，邊個有犯罪案底，家長同學生被蒙在鼓裏，一無所知。點解會咁？咪多得教育局包庇囉。佢哋一直以私隱做擋箭牌，拒絕披露教師註冊資料，包括性犯罪教師名單及被定罪教師有冇被釘牌等資料。所以咯喎，家陣究竟有幾多淫師潛伏喺校園，外界完全唔知，你話係咪荒謬吖？你話校園安唔安全吖？

校園風化案禁之不絕，教育局闊佬懶理，唔通保障淫師嘅私隱仲重要過保障學生嘅安全？正所謂，對敵人仁慈等於對人民殘忍，當局包庇淫師，根本就係助紂為虐，靠害學生！

所以太一叮懷疑，教育官僚其實係校園淫師嘅隱密朋友，如果唔係，點會忍心將一個個天真無邪嘅學生送入狼口。正如教育界話齋，教育局明知性犯罪者重犯機會甚高，居然一直拒絕公開相關資料，根本就係罔顧學生福祉。法律界亦批評，教育局拒絕透露教師註冊資料係錯誤理解法律，變相剝奪公眾知情權，簡直罪加一等。

咁講啦，教育局拒絕公開註冊教師資料，未必係關心性罪犯教師嘅權益，而係關心自己嘅福祉啫。你知啦，少做少錯，唔做唔錯，從來都係港產官僚嘅特色。其實，好多國家早就設立性罪犯名冊，美國及蘇格蘭甚至會喺網上公開風化案被定罪嘅教師名單添，點解外國做得到，香港就做唔到呢？

最離譜嘅係，港府曾經研究設立教師註冊組織，點知一拖就係三十年，至今不了了之，你話港產官僚係咪害人害物吖。

一句講晒，教育局嘅職責係保護學生，唔係保護色狼，唔能夠再做淫師幫兇喇，叮！