城中鏡：陳韻雲籲青少勿心急買樓
後生一輩成日呻置業難，投資有道、頻買豪宅嘅地產代理監管局主席Vivien陳韻雲又點睇呢？佢呼籲年輕人應先積極裝備，提升個人技能，而非急於置業，因「有樓不代表有成就」，佢自己三十幾歲先擁有首個物業。
陳韻雲（右二）祝願「on.cc東網」讀者馬年步步高陞、身體健康！
搬屋兼搬寫字樓
Vivien好謙咁話，「清晒袋」去買白加道間屋，諗住同美國學成歸來嘅兒子同住。自言喺白加道住咗八年，好鍾意呢條街道喺霧線以下，返工又方便。但收匙至今都未諗掂點裝修，皆因過年後又要搬寫字樓，真係公私兩忙。
但鍾意煮幾味嘅Vivien就覺得新屋廚房較細，想搞大佢，又想喺花園預留地方做有機耕種，養番隻狗仔，為退休生活做準備。之前買入嘅壽臣山Shouson Peak洋房就考慮放售。佢喺香港以外嘅唯一物業，就係九六年買落、位於北京長安俱樂部大廈嘅一個面積約三千方呎寫字樓，她笑言，當年摸頂價以一千萬元買入，但十幾年嚟唔使搬來搬去，覺得已抵番晒。
另外，佢尋日同「on.cc東網」讀者拜年，祝各位新年快樂、事事如意、步步高陞、身體健康、龍馬精神。
