城中鏡：議員拜年多花臣

公共專業聯盟尋日喺立法會舉行新春團拜，議員梁繼昌同莫乃光除一如以往講吓來年工作大計，仲特登攞埋自製嘅美食出嚟。莫乃光炮製夏威夷木瓜沙律，話自己年輕時曾去夏威夷讀過一個學期，當時負責接待佢嘅夏威夷家庭經常煮唔少美食畀佢食，佢亦有不時向對方偷吓師，但事隔多年，依家只係識得整呢一味菜。

有豐富下廚經驗嘅梁繼昌就煮咗牛肉，出面仲用錫紙同水草包住。佢話讀書時曾喺倫敦住過十年，期間一直都係自己煮飯食，但依家就無乜機會再大顯身手。至於點解要用水草包住牛肉，佢解釋話水草可以鎖住牛肉嘅肉汁，食起嚟會分外鮮甜。

林大輝望唔再加煙稅

至於身兼行政、立法議員嘅葉劉淑儀尋日就喺fb話農曆年間同囡囡去咗廣州，向八十多歲嘅舅父同舅母拜年，仲一齊去酒樓品嘗廣東菜同點心添！之後佢同囡囡又遊覽動物園，仲同今年嘅主角─「馬」影張合照，話應景應節喎！

立會「四散人」尋日亦搞團拜，其中林大輝話對預算案無乜期望，反而想政府三思，唔好再加煙草稅。佢話加咗煙稅對富貴人無影響，如果叫五、六十歲老煙民戒煙好慘，逼佢哋食貴煙仲慘，所以加煙稅只會令基層市民怨氣更大，無必要咁做。

講講下，佢自爆曾係煙民，晚晚應酬時又鍾意飲酒。佢記得喺九三年，有一晚返到屋企，照鏡時發覺自己個樣好殘、好憔悴，就把心一橫發毒誓，以後唔再食半支煙，亦都唔飲半滴威士忌同白蘭地。