新界鄉議局近年屢次傳出不滿今屆政府施政，近月仲揚言籌組政黨，以捍衞鄉民嘅權益，惹嚟多多揣測。鄉議局主席劉皇發尋日出席鄉議局新春團拜時，一度封口拒談組黨之事，淨係講場面說話，強調喺香港要遵守法治。莫非鄉議局打退堂鼓，不打算組黨，做番個幫建制派抬轎嘅乖乖仔？

設計圖片及對白

雖然發叔識得封口，但其他骨幹就留喺現場做強硬派。副主席林偉強話組黨已迫在眉睫，進行得如火如荼，新界人口多，所以有信心班底唔會太弱，又唔需要向其他黨派挖角。上水鄉委會主席侯志強就話，鄉議局以往幫人抬轎當做運動，如果以後組黨參選就可以自強，始終自己發聲好過靠人哋喎。但佢講明「上場無父子，打仗冇面畀」。嘩！呢啲仲唔係同發叔帶頭做曳仔嘅證據？

係咪等於宣布同建制派決裂？侯志強就話時間尚早，唔使擔心咁多，因為依家係風雨欲來，又無定向，可能隨時雨過天青。佢咁講，係咪暗示緊鄉議局隨時組唔成黨呢？十八鄉委會主席梁福元就話組黨係必然嘅事，因為世上冇永遠嘅敵人，亦冇永遠嘅合作喎！

第一手消息請下載on.cc東網iPhone/iPad/Android/Windows Phone Apps