新年流流，政商界名人都忙於拜年活動，有人選擇以團拜方式一次過見晒所有人，但仍有人堅持傳統，鍾意登門造訪。尋日初七人日，終審法院前首席法官李國能、行政會議成員張志剛前後腳到「前特首辦公室」會晤前特首董建華，唔通佢哋趁特首梁振英唔喺香港，去見太上特首？

張志剛撳門鐘之前四處張望。

李國能與董建華會晤逾一小時才離開。

董建華（右）離開時神情拘謹。

尋日下午三點幾，李國能夫婦乘坐座駕抵達堅尼地城嘅前行政長官辦公室，但只得李國能一個人落車，司機就載李太離去。李國能兩手空空登門，點睇都唔似同董建華拜年咁喎！

過咗一個幾小時，李國能仲未離開，張志剛就嚟到，佢都係兩梳蕉，唔通同董建華有密偈傾？十五分鐘後，李國能施施然走出嚟，張志剛就坐到六點幾先走，睇嚟真係好好傾。

到底佢哋三人喺入邊傾啲乜嘢？行先一步嘅李國能封口唔答，只報以微笑，令件事更添神秘。事後我哋問張志剛去搵董生做乜，張志剛就打官腔，話時不時都同各界人士會面，佢同董生只就香港議題交換意見，無乜特別喎！

第一手消息請下載on.cc東網iPhone/iPad/Android/Windows Phone Apps