政壇：老虎仔發威挑戰鼠王芬
民協喺上屆選舉有馮檢基當選超級議員，幫民協衝出九龍西，但竟然輸咗九龍西老巢席位，可以話係老貓燒鬚。但呢隻貓最近醒覺，剛連任做主席嘅「老虎仔」廖成利尋日突然大發虎威，向九龍西「鼠王芬」梁美芬下戰書。講就犀利喇，但係咪咁勁，真係到選舉嗰刻至知。
設計圖片
提早三年公布排陣
老虎仔同副主席任國棟、譚國僑連埋「大腦」馮檢基，尋日同傳媒講解來年策略。平時斯斯文文、沉默寡言嘅老虎仔突然變得「戰鬥格」，話民協面臨「拔筍危機」（筍是民協標誌），為穩固民協喺九龍西嘅地位，佢會全力爭取一六年排頭位出戰立會九龍西。以往民協到最尾一刻先公布排陣，以免敵人知道布局，但現時提早三年宣布，似乎好有決心。
老虎仔又話近年唔少人問佢係咪退休，佢聽到後都好唔開心，實情係佢低調做地區工作，唔代表退出政圈。為咗幫民協奪回九西席位，重振聲望，佢已諗定作戰口號叫「滅鼠行動」。嘩！擺到明衝住梁美芬喎。佢話如果有人對號入座都無辦法，總之九西鼠患嚴重，唔清理好後患無窮。
咁既然要滅鼠，可以搵番馮檢基或譚國僑，甚至係新人都得，點解要佢老人家出馬？佢解釋話自己叫得老虎仔，即係同山貓同類，捉老鼠又點少得貓呢。究竟呢次係老虎發威定老貓燒鬚，就要睇佢嘅造化嘞！
