菲國總統耍無賴 打蛇要打七寸位

嗱，為咗替死難者家屬討回公道，港府昨日起對菲律賓實施首階段制裁措施，取消菲國外交或公務護照持有人十四天免簽證訪港安排。點知三世祖總統毫無悔意不特止，而且大放厥詞，話無意就人質事件道歉，因為會引發法律問題，仲話中國政府亦唔會為菲律賓人喺當地嘅傷亡事故作出賠償喎。

簡直九唔搭八！三世祖如果唔係思維錯亂，就係個腦有問題。菲律賓人幾時喺中國遇到槍手挾持吖？就算有菲律賓遊客喺中國發生事故都係屬於意外啫，而馬尼拉人質事件係因為菲律賓政府無能及官員失職，導致八名無辜港人慘死，點可以相提並論呢？連菲律賓自己嘅調查都承認官員處理手法嚴重失當，八名港人唔係死於意外，呢隻鑊菲律賓政府唔孭邊個孭？

阿基諾三世厚顏無恥，堅拒道歉，唔止激起七百萬香港人嘅憤怒，有啲菲律賓人亦睇唔過眼，紛紛譴責呢種不仁不義、泯滅良知嘅言行。繼早排三位菲律賓國會參議員指慘劇係因為政府當日未能控制局面而發生，要求菲方向港方作道歉，而菲律賓眾議院外交事務委員會主席亦促請三世祖盡快就事件道歉。呢啲咪叫公道自在人心囉。

雖然菲國政府放風聲話一定唔會道歉，仲死撐話港府首階段制裁措施影響唔會太大，其實有關措施已經傳達咗一個明確訊息：港人唔會就咁算數，一定會堅持到底，直至討回公道。呢，菲律賓副總統開到聲，話希望港府唔好將制裁行動升級，以免影響在港工作嘅菲傭，如果佢哋日後冇咗免簽待遇，要自己畀錢辦簽證，會令收入減少喎。

嗱嗱嗱，邊個話香港手上冇牌o架?家陣連菲律賓副總統都知驚，擔心制裁升級，證明港府嘅制裁打正菲律賓呢條軟皮毒蛇七寸位。正所謂，宜將剩勇追窮寇，首階段制裁措施的確唔夠力，要令菲律賓政府知痛，令三世祖認錯，仲需要加大力度o架。

治亂世，用重典，治無賴，出重招。有立法會議員講得啱 ，呢件事唔可以無限期咁拖落去。冇錯嘞，已經拖咗三年幾，應該有個了斷喇。計太一叮話齋，如果菲方再冇正面回應，拒絕道歉，制裁措施一於加辣，不妨倣效台灣實施經濟制裁，甚至限制菲傭來港，睇下三世祖仲笑唔笑得出，叮！