SUN搞作：少膽虫手記：面試
各位，仲記唔記得少膽虫之前講過，要解僱多啲前線記者，轉而聘請多啲編劇，去維持新聞創作水準？本虫向來一言九鼎，今日我就約咗幾個編劇嚟見工，睇吓啱唔啱使先。
第一個嚟見工嘅係電視台嘅阿叔，見佢氣定神閒咁，我決定考考佢：「阿叔，你覺得點樣作新聞先可以吸引到讀者？」阿叔聽我一問，即時腳都軟埋，良久才吐出一句：「呢方面我真係無心得，你知我哋個台，最叻係慣性收視，邊使用腦諗嘢？」作為腦腫，我清楚知道呢種人唔適合加入作得就作嘅新聞創作部，惟有拜拜。
送走一個又嚟一個，今次個後生仔亦係電視台編劇，只不過來自冇乜人睇嗰間。為咗公平起見，我決定問番同一個問題，後生仔一臉驚訝，反問：「乜編劇係做呢啲嘅咩？我平時主要負責撳回帶同埋重播兩個掣……」少膽虫一聽，其實羨慕到不得了，日日撳兩個掣，又唔使理收視，呢份工去邊度搵？但見呢個滿腔熱誠嘅後生仔，畀新聞創作嘅壓力嚇到震，我知道，我要的人不是他。
成個下午見工都揾唔到合適人選，各位讀者，唔好意思，惟有再忍住《爛果》嘅爛鬼創作先啦！
