城中鏡：新股女王情陷玫瑰腐乳
新正頭未過，好快又到元宵同埋西方情人節，試問有邊個女士唔鍾意玫瑰花？有「新股女王」之稱嘅中央證券登記董事總經理鍾絳虹相信都唔例外。話說佢早前去咗佢有份協助上市嘅「百年老店」老恒和嘅上市晚宴，一試老恒和嘅腐乳同陳醋，就立刻愛上，原來佢哋啲腐乳係用特選嘅玫瑰花嚟製造，帶有淡淡玫瑰花味，而玫瑰陳醋亦係天然釀造，呈玫瑰顏色。嘩！啲食品可以好似玫瑰咁精緻，難怪「新股女王」一見鍾情！
鍾絳虹話食物始終係最容易令人開心同有趣味。（資料圖片）
鍾絳虹話，食物始終係最容易令人開心同有趣味，所以佢覺得協助老恒和上市，比幫其他公司上市來得好玩。
過去多年來，鍾絳虹幫過逾百間公司上市，真係可以話，有乜嘢行業未見過，唯獨精緻講究食品最得到女王歡心。
既然鍾絳虹大讚「百年老店」嘅玫瑰腐乳同陳醋了得，咁嘅話，老恒和嘅老總不如諗吓搵「新股女王」做代言人，可能會吸引到好多散戶買佢哋啲產品。事關鍾絳虹過去成日教啲散戶（如實物股東）點樣供股、抽新股等，散戶對佢好熟悉呢！
