唔少政商界名人都會用印有自己個姓氏嘅利是封，立法會議員Ben陳恒鑌亦唔例外。佢今年就大量印製咗有自己嘜頭嘅利是封。不過，利是封上面除咗有卡通化嘅阿Ben同佢囡囡之外，仲有一個着住藍色衫嘅男仔，唔通阿Ben喺出面有個私生子？

陳恒鑌叫設計師喺利是封畫多個小朋友上去，湊成個「好」字。

對於「私生子」疑雲，阿Ben就解釋話佢原本想將一家三口畫晒上利是封，但太太就唔想上鏡，於是淨係畫咗佢同囡囡上去。但係佢睇見利是封嘅初稿時就覺得好似單親家庭咁，唔係咁好，所以就叫設計師畫多個小朋友上去，湊成個「好」字。

正所謂一年之計在於春，唔知阿Ben有乜新年大計呢﹖阿Ben就話已寫咗份三十頁嘅「將馬路還給元朗大馬路」建議書，提議將元朗大馬路輕鐵「搬」落地底，騰出空間畀路面嘅車輛，以紓緩路面交通問題。至於輕鐵就延伸至西鐵錦上路站，並增設博愛醫院輕鐵站，方便前往醫院嘅市民。立法會年中將檢討鐵路事宜，佢話到時會提交呢份建議書，並約見運輸及房屋局局長張炳良傾清楚喇！

第一手消息請下載on.cc東網iPhone/iPad/Android/Windows Phone Apps