政壇：搞搞政：鬍鬚曾被批「心力交瘁」
啱啱踏入馬年，我哋繼續按慣例，邀請香港術數家協會術數師楊子東推算香港運程。開年第一件大事，相信都係月底揭盅嘅新一份財政預算案，咁財爺鬍鬚曾會唔會繼續做「守財奴」？楊師傅冇正面提及，但就根據鬍鬚曾八字中嘅年、月、日三柱，批算即將發表任內第七份預算案嘅鬍鬚曾「心力交瘁、已萌退意」，正二月不但要注意心、血、眼健康，更有可能明年「跳船」添！鬍鬚曾年年估錯數，又死守庫房拒絕規劃長遠扶貧措施，早就應該順應民意退下火線，過佢飲咖啡、睇法國電影嘅「中產生活」啦！
設計圖片及對白
劉江華立秋後仆直
楊師傅形容馬年香港乃「一片火海比劫爭財之局面」，政局方面，香港上半年皆處困境，「有政府等於冇政府」、雞鳴狗盜之事頻生，立秋後先有望好轉。今年政府工作「重中之重」係政改諮詢，政改方案有望今年第四季出爐，咁究竟係吉定凶？
楊師傅就此批算政改三人組馬年之吉凶，佢話政務司司長林鄭月娥運程一般，其中正二月最頭痕，七、八月可得到好處，九月運情再度反覆，十一月更大事不吉；政制及內地事務局局長譚志源喺上半年亦諸事不順，七、八月就行事有利，副局長劉江華亦將喺立秋後仆直。照咁睇，政改方案似乎唔應該等到第四季先出爐喎！不過，玄學呢樣嘢，信不信由你。
