政壇：胡楓驚哪吒捱壞身子
西貢區區議員「哪吒」方國珊，雖然前年立法會選舉落敗，喺區議會又被泛民、建制聯手狙擊，但反而激起「哪吒」嘅無畏戰鬥格。好似佢一手創立嘅地區政團「專業動力」就愈做愈大，前晚就請各界好友食開年飯。佢契爺胡楓（修哥）話契女又勤力又搏命，但希望佢搏還搏，最緊要注意健康，千祈唔好捱壞身子。
胡楓（左）為契女方國珊（右）打氣。
哪吒前晚喺九龍城擺咗八圍，出席人士包括鄉議局前主席張人龍嘅夫人、世界綠色組織行政總裁余遠騁等，仲有粵劇界名伶吳君麗同楊麗紅。近期人氣急升嘅「小生」胡楓當晚搶咗哪吒唔少鏡，唔少人爭住同佢合照。修哥亦好識做，即場唱咗兩首歌娛賓，一班酒樓侍應仲聽到入晒神。
雖然契爺勸喻唔好太搏，但哪吒話一日見到將軍澳堆填區存在，一日見到班立法會議員偷懶，差啲被政府偷雞通過擴建將軍澳堆填區，佢就要繼續奮鬥。佢話明年區選在即，新年願望係「專業動力」能夠培育更多新人服務地區，如果有十個八個出選就最理想喇!
