早前網上流傳一條計算綜援家庭每月總收入嘅明細表，話一個四人家庭每月可以袋落嘅綜援金多達二萬一千幾蚊，好多網民見到條數都好火滾。立法會勞工界議員鄧家彪就透過立法會要求勞工及福利局局長張建宗澄清，最好清清楚楚列出每個細項，等市民睇清睇楚，以免令綜援家庭被針對。
話說嗰條令人睇到眼火爆嘅算式，係講緊二○一一年兩個大人加兩個小朋友嘅基本綜援金額，加埋嗰年政府派嘅六千蚊，仲有關愛基金嘅海外遊學資助、午膳津貼等，計計埋埋一個四人家庭每月就有二萬幾蚊收入。
其實之前社會福利署署長馮伯欣喺立法會都有講過，四人家庭平均綜援金，大概係一萬一千八百蚊，但鄧家彪話呢條算式已廣泛流傳，誓要局長「交數」講清楚條數係點計。
第一手消息請下載on.cc東網
