政壇：劉怡翔太太「被改名」
接替梁鳳儀做財經事務及庫務局副局長嘅James劉怡翔，早前公布佢嘅利益申報文件，並上載至局方網頁。不過，我哋一打開就發現James嘅太太，即係拔萃女書院校長靳麗娟竟然改咗名做勒麗娟。點解劉太會無端端改咗姓嘅？莫非James寫錯老婆個名？
當局指劉怡翔並冇寫錯太太靳麗娟個姓。（資料圖片）
靳麗娟
財庫局回應話呢個其實係手民之誤，事關James提交嘅手寫版本並冇錯，但職員處理文件時就打錯咗，佢哋知道錯誤後，已即時更正。
話時話，點解James會喺份有錯字嘅利益登記文件上，照樣簽名作實呢？消息就話可能James集中查清楚啲利益詳情，而忽略咗太太個名。作為問責官員，凡事都係細心啲好。
講番申報內容，James好鍾意置業，除咗同太太有一個南區嘅住宅，仲同妻女聯名持有兩個油尖旺區單位。此外，新任發展局副局長馬紹祥都申報咗，佢同太太共同擁有一個九龍城單位，仲有一個位於澳洲墨爾本嘅單位。
