政壇：港台團拜Greg蘇無影

依家港台新大樓興建無期，港台嘅高層口口聲聲話可惜，員工就質疑港台有被「陰乾」之嫌，紛爭唔知幾時先至停，咁啱港台尋日搞新春團拜，果然高層喺度呻，員工就即場舉揮春抗議，但在場竟然唔見商務局長Greg蘇錦樑蹤影，一班反對港台新大樓撥款嘅立法會建制派議員亦缺席，唔通大家因為撥款而搞到面左左？

記者問過港台，港台就話同局方好似「一家人」，所以唔使發出正式邀請。自從上年開始，佢哋縮短咗團拜形式，淨係邀請廣播傳媒同業，局長就開始冇出席，由廣播處處長鄧忍光代表主禮，至於立法會就淨係邀請資訊科技及廣播事務委員會委員。

樹根撞活動 EQ無時間

話時話，立法會資訊科技及廣播事務委員會有二十二個委員，當中十個係泛民，但係只得支持撥款嘅資訊科技界泛民議員莫乃光現身，九個泛民「no show」。

搵咗幾個冇去嘅建仔議員，其中鍾樹根話撞咗地區團拜活動，揚言應酬區緊要過應酬官，唔去唔係針對港台。至於葛珮帆（EQ）就話只係無時間，強調唔出席同撥款一事無關，仲話佢未做議員之前，都成日以港台顧問委員會成員身份出席喎！