富豪玩具救援機 官僚奢華嚇死你
機艙設備豪華，寬敞舒適，加上可以一百八十度轉動嘅真皮梳化、名貴餐桌、萬呎高空上網、衞星電話等等，一一任君尊享，讓你有「飛一般」嘅超凡旅程。咪以為太一叮介紹緊某某富豪嘅私人飛機，其實呢架係政府飛行服務隊嘅救援機咋，你話港產官僚幾識歎吖。
係咁嘅，飛行服務隊耗資接近七億八千萬元，購入兩架新噴射機，代替老化嘅定翼機。本來呢，更換設備唔係問題，問題係新飛機係商務噴射機，一般只用來款待國家政要同貴賓，港府居然用作救援機，等於警隊用勞斯萊斯當警車，你話係咪荒謬吖？如果個個部門都係咁，洗腳唔抹腳，使錢如倒水，庫房多多錢都唔夠佢哋揈喇！
更荒謬嘅係，當局添置救援機唔止買貴貨，仲買錯貨添。由於兩架新機要經過改裝至適合進行搜救工作，早前喺加拿大試飛時出現無法平衡、左右擺動等問題，所以至今未獲批出認證，當局話喎，兩架新機預計今年下半年抵港。就算係咁，都比原定日期遲咗十五個月，搞到現有嘅兩架老爺救援機無法如期退役，萬一有乜冬瓜豆腐，港產官僚真係害人不淺咯。
你話嘞，港產官僚係咪抵鬧吖？大花筒已經夠衰喇，仲要買錯貨影響救援工作，簡直係「飛一般」混帳，罪加一等。立法會議員就批評得啱嘞，全球機種眾多，飛行服務隊樣樣唔揀，偏偏睇中被指為「富豪玩具」嘅商務噴射機，做法並不合理，要求當局解釋原因。其實計太一叮話齋，仲使乜解釋吖，原因一字咁「錢」，反正花費嘅係納稅人嘅錢，梗係有咁奢華得咁奢華啦，如果要佢哋自己畀錢，你估仲會唔會咁豪爽吖嗱？
所以話啫，財爺曾俊華警告財政儲備會有用盡一日，睇嚟又唔錯得晒，政府部門倒水咁倒，就算有金山銀山都頂唔順喇。呢，香港電台淨係興建新大樓咋，就攤大手板攞六十億元，你估港府真係識印銀紙咩。好彩港台新大樓計劃最後觸礁收場，如果唔係，呢個財政黑洞都唔知要填到幾時。
一句講晒，富豪玩具救援機，官僚奢華嚇死你。各位港產官僚，你哋受納稅人供養，職責係服務市民，唔係扮富豪歎世界，唔好搞錯晒吖。前特首曾蔭權爵士就話「貪盡省港澳、歎盡海陸空」啫，唔通你哋都想有樣學樣，叮！
