城中鏡：壽星鄭錦鐘為金多寶監場
農曆正月初五，城中一大焦點就係今晚嘅六合彩新春金多寶，日前見到保良局主席鄭錦鐘（Eric）同太太一齊出席新春活動，講起新年節目，佢透露今日年初五係佢牛一，而農曆生日同西曆生日更喺同一日。咁開心真係要好好慶祝喎，Eric笑笑口透露佢仲有個大任務，就係為六合彩新春金多寶監場嘞。生日都要孭起咁重要嘅任務，真係唔話得！
今日牛一嘅鄭錦鐘（右）會為六合彩新春金多寶監場，見證幸運兒誕生。左為鄭太。
Eric解釋，早前獲悉有關方面搵佢為六合彩攪珠監場時，一度諗過要推，不過最後都決定今日提早切蛋糕，咁樣咪可以各方各面都照顧周到囉。
講番今晚監場六合彩，Eric可以話係間接見證四千萬彩金花落誰家，佢祝大家好運之餘，仲希望屆時領到四千幾萬元彩金嘅幸運兒，不忘捐錢畀保良局行善喎。為保良搵善款唔放過任何機會，呢個保良人真係夠晒醒目。
