城中鏡：兩美回流學煮賀年菜
農曆新年係華人圈嘅大事，賀年菜同過年必備嘅湯圓都唔少得，不過家下新一代跟足傳統做嘅已經好少，更莫講話喺海外讀書嘅一批半唐番。名模馬詩慧嘅囡囡王曼喜（Kayla）同前港姐周美鳳嘅囡囡蔡欣熹（Florence）都喺美國讀書畢業回港，兩人因一齊跳舞而成為好朋友，雖然曾經離家喺外國生活一段日子，但佢哋都有興趣跟媽咪學吓整賀年菜。
王曼喜（左）話咁多味菜當中以黃金蝦最難搞。右為王嘅媽咪馬詩慧。
周美鳳（右）同囡囡蔡欣熹，合力炮製賀年菜。
搵飯店大廚偷師
兩位社交界新星同媽咪一齊向滬江飯店大廚偷師，幾人合力做咗六道賀年菜，包括有「五福臨門」、「嘻哈大笑」、「年年有餘」、「發財就手」、「翡翠滿屋」同「合家團圓」。Kayla話黃金蝦最難搞，而Florence就覺得髮菜元蹄最考工夫。Kayla笑說：「每年都會一家人去太婆屋企拜年，想試吓煮少少嘢畀屋企人食。」至於Florence就唔怕肥，認為元蹄配飯食至可口。
