新年到，萬象更新開新篇！城中名人早前齊集紅磡一間酒店喜迎新歲，莎莎國際主席郭少明今年豪擲八百萬元贊助初二賀歲煙花，「紅唇」、「粉紅小花」、「紅蝴蝶」綻放夜空，繽紛璀璨，格外奪目。郭生放煙花，太太郭羅桂珍、大女郭詩慧（Melody）、女婿陳振邦（Davis）同細女郭詩雅盛裝撐場，一身紅噹噹打扮嘅郭太，喜氣洋洋。郭生以鮮紅西裝襯番太太，可惜佢身體抱恙聲沙沙。

郭少明（中）全家出動觀賞煙花，同太太郭羅桂珍（右二）、大女郭詩慧（左二）、女婿陳振邦（左一）及細女郭詩雅（右一）祝願港人新春馬到功成。

梁智鴻伉儷（左及中）嘅細仔Eric（右）由外國返港陪父母度新歲，兩人喜出望外。

顏寶鈴（右）同契女林玉茵（左）齊讚今年煙花好燦爛。

睇好競爭優勢持續

講起新一年生意經，郭生話好樂觀，睇好今年零售業仍有增長。佢分析話，嚟緊高鐵、港珠澳大橋同新酒店相繼落成，深信香港競爭優勢會持續。Melody同老公向來恩愛，就快到浪漫情人節，Davis已計劃畀太太一個驚喜，係啲乜，好快揭盅。

港大校務委員會主席梁智鴻伉儷都帶埋細仔Eric湊熱鬧，阿仔喺東南亞一個跨國酒店集團任要職，平時忙到無暇陪父母過新年，今晚三人行，認真難得。

煙花宴上，前保良局主席顏寶鈴孖埋前主席梁寶珠千金林玉茵並肩欣賞盛況，兩人有講有笑，原來佢哋係契媽同契女關係。顏太話新年有大計，過兩日飛孟加拉開帽廠，初步聘請千五名員工，稍後增至五千人，皆因內地經營成本上漲，要另覓生產基地至得。

第一手消息請下載on.cc東網iPhone/iPad/Android/Windows Phone Apps