年初五，是中國過年習俗的「開市日」。

古時中國人視「過年」是頭等大事，也因中國地大，幅員遼闊，親屬居住遠離，每年趁兩三大節聚頭，除中秋月圓外，就靠歲首團聚的了！

就係因為過年茲事體大，樣樣嘢都得要做到最好，盡量不能出岔子，故有不少忌諱，必須遵守，最穿鑿附會的，莫如年三十晚後，唔准洗頭，有啲鄉間習俗，仲唔准沖涼添噃！還有，又唔准掃地，尤其係「向外掃」，若一定要掃，便得由外向內之方向掃回來，因不得將「福氣」掃走咁話喎！有啲誇張到過年嗰幾日，唔准有掃把出現眼前，所以，年三十晚掃完地之後，便須將掃把和垃圾鏟收埋，不得曝光，如不小心打爛嘢，除視為不吉利之外，滿地玻璃碎也只能用手，慢慢執拾！

好啦！一切唔准做嘅「禁忌」，在年初五可「重生」嘞！「開市日」，除店舖啟市做生意，民眾這日解除忌諱，掃地啦！把積存多天的垃圾「倒出」去啦！洗頭潔淨啦！乜都無問題了！其實，這天，正正是回復正常之象徵。

此外，古時，不似今天世界，全年無休，那時候，坊間店舖休市停頓成個星期，真不方便的，連醫生大夫也不應診的！當時又無雪櫃，街市再唔開檔，真係無啖好食也！

好啦！年初五恢復正常過活，又是一年忙碌的開始，大家努力努力吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps