政壇：搞搞政：唔撐標準工時會計界寧補水

一般基層打工仔對立法規管標準工時都舉腳贊成，但亦有唔少行業嘅僱員反對立法，或者要求立法時豁免佢哋嗰行。由Nelson擔任主席嘅會計專業發展基金近日率先發表業界工時調查結果，調查喺去年十月中至十一月初進行，向會計同業發出逾五百份問卷，收集佢哋嘅工資水平同工時數據，結果發現近六成半受訪者平均一周加班兩至五日，逾四成人要長期加班，八成人不獲加班補水，調查仲發現三十五歲以下嘅年輕會計師加班情況最為嚴重。

Nelson話，好多年輕會計師都同佢講寧願要假唔要錢，即補假比補水更為實際，直指「標準工時未必幫到佢」。業界嘅立法會代表Kenneth話，正搵緊中大亞太研究所幫手就會計界工時問題展開大型研究，夏季至有結果，但Kenneth都強調，毋須調查過都知，非體力勞動嘅會計師行業要推行標準工時係有一定困難，仲認為加班補水對年資淺嘅業者較有意義喎，但對較高層人員就未必適用嘞。