東網電視
更多新聞短片農曆年假期結束，隨着馬年首個工作日掩至，新春期間暫時靜咗嘅聲音又再響起。財政司司長鬍鬚曾月底就會發表新一份財政預算案，被喻為守財奴嘅鬍鬚曾年前因為忽視中產，完全唔顧中產一族有稅交、冇糖嗒嘅苦況，而畀人鬧爆，政圈近日嘅風向，已經可以睇到佢今年難逃中產嘅狙擊。
白鴿黨出動「財神」向政府要求為中產紓困，鬍鬚曾聽到冇？
假期中，先後有政黨同團體去政府總部請願，其中一個訴求就係紓減中產之困。尋日白鴿黨都嗌埋一份，佢哋出動「財神」，要求鬍鬚曾做個回應中產需要嘅財爺。據講，鬍鬚曾想整份減少開支嘅預算案，但民間嘅呼聲卻係逆向而行，尋日白鴿黨就要求調高薪俸稅免稅額及稅階、再度寬減薪俸稅及差餉，以及維持電費補貼、公屋免租及綜援出雙糧等一次性派糖措施。
佢哋估計，港府本年度財政盈餘將高達五百億元，做晒上述要求都只係使約二百七十五億元啫，政府絕對有能力承擔。舊年被鬧到要以中產自居嘅鬍鬚曾真係要醒定啲，否則度定台詞、自居乜都冇用。
第一手消息請下載on.cc東網
