政壇：陳百里預算案前夕擺酒
馬年係雙春兼閏月，係婚嫁大喜之年，據講揀正呢啲好年結婚，婚姻甜蜜美滿，仲好快可以開枝散葉添。平時怕怕醜醜嘅商務及經濟發展局政治助理陳百里就揀咗喺馬年做新郎，再過兩個幾禮拜就會同女友拉埋天窗，佢哋仲揀正喺預算案公布前一日嘅好日擺酒，唔知百里新婚翌日會請假度蜜月吖，定係如常到立法會聽財爺發表預算案呢？
陳百里會喺預算案公布前一日擺酒結婚，可喜可賀。（資料圖片）
講起馬年政界喜事，仲有財經事務及庫務局局長陳家強份，佢大仔David三月中會同拍咗拖幾年嘅韓籍女友Dina拉埋天窗，聽講Dina樣子甜美，曾經喺香港打工，其後轉往美國發展，結識到同樣從事金融業嘅David。陳家強係本港知名金融學者，之後離開大學加入「熱廚房」做官主理財金政策，表現亦有板有眼，即使做老爺嘅唔識韓文，將來都肯定有大把話題同個新抱傾偈交流。
