政壇：鐵頭仁留番藏書坐監睇
前年立法會選舉前夕，白鴿黨立法會議員何俊仁（鐵頭仁）被揭發其天后廟道飛龍台寓所嘅露台曾經僭建玻璃窗，事件經傳媒廣泛報道後，佢仍然拆剩兩支鋁質支架。早前佢屋企進行大裝修，終於將嗰兩條支架都拆埋，成個露台還原基本步。鐵頭仁尋日邀請傳媒上佢屋企拜年時，自言成件事最唔好意思嘅，就係累到隔籬左右都要跟埋佢一齊拆晒啲僭建物。其實咁咪好囉，大家一齊奉公守法，唔好知法犯法，唔通身為律師嘅鐵頭仁唔同意？
鐵頭仁曾經僭建玻璃窗嘅天后廟道寓所，終於拆晒所有僭建物。
鐵頭仁自言會留番啲書將來坐監時慢慢睇，真係大吉利是！
鐵頭仁又趁今次大裝修，將囝囝間房間咗個空間出嚟做佢自己嘅書房，不過因為佢有成幾千本書，就算有新書房都係擺唔晒，最後搞到連個客廳、飯廳，甚至間工人房都有佢啲書。佢自爆呢鋪買書癮已經跟咗佢好耐，早喺七十年代，唔少香港打工仔每月只得一千幾百蚊人工時，佢已經一次過花二千幾蚊買入一套約六十冊嘅世界名著。
不過鐵頭仁承認，屋內好多書至今都未開封，惟有等將來佢因為「佔領中環」而坐監時再慢慢睇喎。新年流流又講「輸」又話坐監，真係大吉利是囉！
