單仲偕四萬咁口向大家拜年，但一講起海怡西補選就冇晒笑容。
大年初四，好多人都做好馬年再出發嘅準備。白鴿黨立法會議員單仲偕（單雞）尋日喺佢屋企舉行新春團拜，煮咗多味應節中式佳餚招待傳媒，包括專程喺香港仔買番嚟嘅金蠔、購自深水埗代表「富足」嘅腐竹、寓意「橫財就手」嘅蓮藕豬手，同埋無落魚翅、夠晒環保嘅秘製佛跳牆等，認真好意頭。不過當談及稍後舉行嘅南區區議會海怡西選區補選，單雞就即刻收起四萬笑容，直言自己無乜勝算。大年初四就狂倒自己米，認真大吉利是。
人民力量主席袁彌明將出戰海怡西選區補選。（資料圖片）
海怡西補選本周五開始接受提名，下月二十三號投票，以填補該區原區議員、前民主黨中委馮煒光辭職加入政府出任新聞統籌專員後嘅議席空缺，除咗同屬泛民主派嘅單雞同人民力量主席袁彌明（Erica），預計建制派會派新民黨成員陳家珮出戰。單雞尋日話最近幾次落區都見唔到陳家珮，但「空降」參選嘅Erica就比自己更勤力落區，仲不時向街坊派發香包等小禮物，估計至少會鎅走佢五、六百票，令陳家珮漁人得利。總之佢今次都係盡力而為，成事在天啦！
第一手消息請下載on.cc東網
