政壇：新正頭玩杯葛 「小學雞」自我邊緣化
農曆新年伊始，政界拜年活動一籮籮，不過，喜慶時刻卻頻見杯葛暗戰！無幾耐之前，政府嘅司局長被指杯葛富貴黨，唔出席佢哋嘅黨慶活動。俗語有云「有仇不報非君子」，我哋就收到消息，話富貴黨都以牙還牙，唔會出席特區政府新春酒會；另一邊廂，工黨亦跟風玩杯葛，尋日講到明唔去中聯辦新春酒會。兩黨新正頭玩杯葛，動機各異，但難免予人「小學雞」嘅感覺，於大局無益，分分鐘仲自我導演一齣政壇邊緣化嘅悲劇，手腕高低由此可見一斑。
設計圖片及對白
富貴黨對今屆政府政策表現得唔多「保皇」，好多時仲掉轉槍頭，同泛民連成一線，咁嘅取態連唔少建制派都對佢哋有意見。雖然該黨黨魁田北俊（田少）話「冤有頭、債有主」，佢哋未來嘅行動唔會針對政府，但今個月十一號，特區政府喺禮賓府搞嘅新春酒會，聽聞富貴黨一個人都唔去，而立法會今個月二十四號主場宴請官員嘅午宴，富貴黨都冇派人去，真係杯葛得幾徹底！
白鴿仔自決去唔去
至於泛民方面，中聯辦今個月十三號舉辦新春酒會，今年仲首度邀請所有泛民主派立法會議員出席。泛民之前就話中聯辦喺西環回請議員敏感，搞到不了了之啫，今次地點係會展噃，點知工黨主席李卓人尋日表明，中央冇誠意落實真普選，所以佢哋決定杯葛唔出席，亦提議泛民議員唔出席。社民連、人民力量、新民主同盟等激進泛民都唔打算去。
不過溫和泛民就冇被牽住鼻子走，白鴿黨議員單仲偕話，佢哋唔打算杯葛酒會，而會容許收到邀請嘅黨員自由決定，佢自己就會出席，主席劉慧卿之前講到明，要留守立法會辯論施政報告而唔去。公文袋議員陳家洛就話，一向都唔去呢啲禮節性酒會，不過黨魁梁家傑就會去。泛民飯盒會召集人、民協議員馮檢基都會出席，話打個招呼、見個面喎。
