酒店趁火打劫 旅遊之都趕客
俗語話，一年之計在於春，而對於旅遊業嚟講，應該係一年之利在於春至啱。呢嗱，今年春節客似雲來，訪港旅客人數又創新高，業界賺到盆滿缽滿，固然可喜可賀，之不過咁，有啲酒店乘機抬價，房租一加就係三倍，好似想食咗人哋隻車，咁就未免太無良咯！
唔係太一叮亂講o架。旅遊業人士話喎，新春訪港旅客預料比去年同期增長逾一成，每日約有七百至八百個內地團訪港，人均消費高達七、八千元，用「財神爺」形容佢哋一啲都唔誇張。正因為咁，有啲酒店乘機博懵，三星級酒店每晚房租要三千元，四星級為四千元，係平日嘅三倍價錢，連普通賓館都水漲船高，叫價千五元一晚。最誇張嘅係，有酒店網上標價達到一萬元一晚，問你怕未！
即係咁，香港係自由市場，酒店在商言商，旺季加價無可厚非，問題係，房租一加就係三倍，咁同劏客有乜分別呢？正如業界人士話齋，呢啲簡直係趁火打劫，酒店房價雖然有淡旺季之分，但業界亦應自律，唔好加得太離譜，否則旅客畀你劏完一次，就好難再有下次，到頭嚟即係倒自己米！
冇錯嘞，香港近年經常發生劏客醜聞，早就臭名遠揚，再加上酒店趁火打劫，「旅遊之都」招牌遲早不保嘅咋。其實，有因必有果，有需求必有市場，酒店之所以出現海鮮價，皆因房間嚴重不足。早前政府發表報告，指去年訪港旅客超過五千四百萬人次，預計二○一七年達到七千萬，二○二三年更會突破一億，但目前全港酒店加加埋埋只有七萬個房間，到二○一七年亦只係增至八萬四千間，遠遠追唔上需求，搞到酒店好似皇帝女咁，根本唔憂無生意，有乜法子唔坐地起價吖。
港產官僚口口聲聲要發展旅遊業，仲話旅客人數不設上限添，但對於旅遊設施嚴重不足、酒店房間供不應求、旅遊景點缺乏新鮮感、購物熱點秩序混亂、中港矛盾愈演愈烈等等，佢哋就闊佬懶理。當局係就係承諾要喺十八區增加景點，提升接待旅客能力，仲話要開發大嶼山，發展橋頭經濟添，可惜吖，佢哋講就天下無敵，做就無能為力，所謂增加景點及發展橋頭經濟，純粹大隻講嘅咋。
咪話太一叮唔提醒，酒店趁火打劫，根本就係趕客，損害香港旅遊形象事小，激化中港矛盾事大，唔該港產官僚醒醒定定，唔好淨係識得食老本，如果唔係，遲早坐吃山崩，連粥水都冇得食吖，叮！
