SUN搞作：少膽虫手記：派利是
大門昨日為少膽虫而關上，少膽虫好似發咗場夢，究竟係返工定出賣肉體？少膽虫至今仍然諗唔通、鬱鬱不歡，今日仲唔多願意返公司。
不返不返還須返，少膽虫返到公司，就見到淫賤黎烚熟狗頭，笑逐顏開咁派開工利是。無錯，淫賤黎拖到初四至肯施捨。少膽虫當然唔執輸，狗衝過去攞番封利是，利利是是，門面功夫都要做足嘅：「多謝腦細，感謝腦細，祝腦細青春常『蛀』，《爛果》年年有『餘』！」淫賤黎聽到恭賀嘅說話喜上眉梢：「虫，今鋪真係唔使蝕喇！」少膽虫大惑不解，淫賤黎續講：「星仔話垃圾回收率暴跌，咁啱《爛果》回收率都跟住跌，嗱，證明多番人睇《爛果》，讀者回流啦！」
聽到如此無稽嘅愚論，少膽虫目瞪口呆，「腦細……」「虫！真係新一年，有希望！呢封大利是畀虫你嘅……」少膽虫戰戰兢兢接過封利是，緩緩吐出：「其實回收率叫做跌過，係因為啲報紙霉到無人肯收，全部係直接丟去堆填區……」
淫賤黎如意算盤打唔響，頓時望實少膽虫封利是，睇怕少膽虫封利是都係袋唔穩嘞！
