政壇：搞搞政：建仔五老齊退掀接棒激鬥
二○一六年嘅立法會選舉雖然距離依家仲有兩年，但政圈已經有唔少動作。多個主要政黨嘅議員在位多年，係時候「除舊迎新」，建仔現有嘅「五老」、即已年過六十嘅資深立法會議員譚耀宗、曾鈺成、陳鑑林、葉國謙同黃定光盛傳會一次過一齊退下，讓位畀黨內第二梯隊，但邊個接班就爆發爭位戰，作為退下一員兼現任主席嘅譚Sir有排頭痛嘞！
設計圖片及對白
九東陳曼琪最出位
五老退下傳咗一排，選區喺九東嘅陳鑑林（橄欖）尋日趁赤口邀記者上佢屋企拜年，佢爆料話，依家一共有六人報名參加黨內遴選接佢個位，包括兩名黃大仙區議員黎榮浩同陳曼琪，以及四名觀塘區議員洪錦鉉、柯創盛、顏汶羽同張琪騰，佢拒絕透露撐邊個，強調黨內有透明同公平嘅遴選機制喎。
有資深地區人士分析，建仔六名九東接班人選各據一方，暫未有人佔有明顯優勢。如果論資歷就以黎榮浩同陳曼琪較資深，兩人亦一直有更上一層樓嘅意願。當中陳曼琪最近更以個人名義，高調提出一個頗為保守嘅政改方案，大有向建制派選舉操盤人「交心」之意，好似想取代橄欖作為保守派代表人物嘅角色咁。
至於最早表明心迹將喺一六年「裸退」嘅曾鈺成，佢退休後空出嘅港島區議席，據聞暫時最少已有三人想爭奪，包括之前已爭咗一輪嘅兩名中西區區議員張國鈞同陳學鋒，最近再傳出南區區議員朱立威亦都磨拳擦掌，報咗名參加黨內遴選。
