政壇：盧偉國扮財神焗桑拿
市民今年過咗個好溫暖嘅農曆新年，連日嚟日間氣溫都升到二十度以上，係自○七年以嚟最熱嘅農曆年。工程界立法會議員盧偉國尋日扮財神落區，喺街頭向市民大派朱古力金幣利是，雖然做足準備，但暖笠笠嘅年初三都令佢一頭汗，佢直言同舊年啱啱相反。
盧偉國（左）扮財神派利是派到成頭汗。右為大埔區議員羅舜泉。
盧偉國落區前已做好準備，喺財神衫裏面淨係着住件恤衫，不過，要喺街頭不斷同市民打招呼，又要戴財神帽，一陣間就成頭汗。佢話，舊年天氣比較凍，佢喺財神衫入面着咗幾件衫，結果都凍到不斷打冷震，今年天氣就反常地暖和，佢企喺大埔墟火車站派利是，唔夠幾分鐘已經標晒汗。不過見到啲市民反應咁熱烈，短短半個鐘已經派出超過二千封利是，佢話幾辛苦都係值得。今年六十一歲嘅盧偉國生肖屬龍，佢自言「龍」同「馬」可以合組成「龍馬精神」，所以屬龍嘅今年一定會好運喎。
