SUN搞作：網絡小說：霸權講晒

「命案日增，睇嚟都係時候要管制槍械。」面對數百位槍械愛好者，美國小黑子只敢低頭細語。「西部牛仔嘅英雄氣概，點可以畀人管制，我哋堂堂西人，有槍係我哋嘅自由，係人權！你唔會唔理民情啩？」小黑子在「自由人權」前，無計可施。

「既然係咁，我哋都要擴張自衞隊！」一位日本人突然大聲高叫。小黑子搖搖頭，「不過你哋係戰敗國……」話未畢，日本人便插嘴道︰「我哋咪無軍隊囉，你又唔係唔知我國同周圍國家都有牙齒印，所以係好需要自衞，唔擴張自衞隊又點自衞呢？何況呢啲係自由，係人權！你唔會唔顧盟友啩？」小黑子再次敗在「自由人權」上。

「咁我哋都可以擁有核武喇！」原來北韓金仔都在人群中。惟此次，小黑子立場堅定，「唔得，一定唔得！」金仔極不滿意，「哦，美國人同日本人就有自由同人權，我哋就冇，我哋依家唔係人咩？」小黑子面色一轉，霎時化身布殊，「你哋係邪惡軸心……」