SUN搞作：少膽虫手記：開年飯

「睇見啲餸都流口水，呢餐多謝晒呀，腦細！」門面說話點都要講嘅。「你啱食就好。」淫賤黎笑住話︰「我仲專誠叫人帶咗隻鮮雞落嚟畀你歎呀！」風頭火勢仲食雞？但腦細叫到，少膽虫惟有死撐︰「咁正！唔知點食法呢？」「廣東人做雞有好多種方法，今次我想試吓咁食。」淫賤黎講完就攞咗碟生雞出嚟。

食雞刺身咁刺激？命仔攸關，少膽虫即刻轉軚︰「其實雞呢味嘢我就……」淫賤黎面色一沉︰「你唔係唔畀面呀？」呢鋪冇彎轉，少膽虫焗住擺舊雞刺身入口，仲要扮晒陶醉︰「雞有雞味，好鮮呀！」

點知淫賤黎見狀居然嚇到呆咗︰「食生雞？你咁污糟架？」少膽虫大惑不解︰「乜你唔係話要試吓食雞刺身咩？」「我諗住試吓開年打邊爐咋！」淫賤黎一面厭惡︰「你都係放假放到年初十啦，費事有病惹埋我呀！」無啦啦有假放，少膽虫都唔知應唔應該開心。