賀年品樣樣有毒 迎新歲自求多福
送蛇迎馬，萬象更新，聽日就係大年初一，大家準備好賀年三寶未吖？三寶者，全盒、揮春、利是也，呢幾樣都係中國人過年嘅必備物品，取其意頭十全十美、迎春接福、大吉大利，所以年年都不可少。
不過咁，如果賀年三寶變咗賀年三毒，迎春接福變成迎春接毒，咁就大吉利是喇！
唔係危言聳聽，本報喺市面抽取三款全盒、五款揮春及七款利是封檢測，結果發現所有樣本嘅總揮發性有機化合物含量（VOC）均嚴重超標，部分產品嘅甲醛含量同樣超出標準。大家都知道，VOC係有毒物質，根據環保署室內空氣質素指標，安全水平為不多於261ppb，但係三款全盒中，其中一款竟錄得高達2,000ppb，超出標準逾六倍。而揮春亦唔好得去邊，未打開包裝時所有樣本嘅VOC數值只介乎80ppb至100ppb，但係一打開包裝，數值即刻「步步高升」，全部錄得超過1,000ppb，其中一款更加近乎「爆錶」，超標逾十六倍，你都咪話唔得人驚。至於七款利是封，同樣全部超標到冇朋友，問你怕未。
咁都未算吖，賀年品甲醛含量一樣咁恐怖，當中四款揮春及四款利是封驗出超標，最「毒」一款揮春嘅含量比環保署建議標準超出二十五倍添，話係「迎春接毒」，一啲都冇誇張。
新年流流，人人都想身體健康，家宅平安，家陣賀年品三毒臨門，共聚一堂，睇怕市民要自求多福嘞。嗱，學者及醫生警告，如果室內空氣唔流通，揮發性有機化合物有機會積聚不散，市民拜年時長時間吸入，會對身體造成影響，輕則損害肝臟同神經系統，重則可能致癌！
所以話，港產官僚真係靠害，明知全盒、揮春、利是封係市民新年必不可少嘅產品，監管居然甩甩漏漏，搞到喜氣洋洋變咗毒氣洋洋，簡直豈有此理。正如立法會議員話齋，香港法例落後過人，好多含有高濃度VOC嘅物品都不受規管，又冇訂立標籤制度，令市民身陷毒網而不自知，唔係靠害又係乜吖？
講開又講吖，港產官僚製造VOC危機，都唔係第一次嘅嘞。前年添馬艦「門常開」啟用，立法會大樓因為充斥VOC而淪為毒氣室，如果唔係東方報業集團獨家踢爆，迫使當局全速「排毒」，一眾民意代表依家可能仲吸緊毒氣都似。
賣懶，賣懶，賣到年三十晚。港產官僚唔好再咁懶散嘞，快快做好自己份工。當然喇，各位市民最好自求多福。太一叮祝大家新一年龍馬精神，喜氣洋洋！
