城中鏡：八位傑出名人獲理大頒院士
香港理工大學尋日向八位嚟自唔同界別嘅傑出人士，頒授大學院士榮銜，表揚佢哋對理工大學同社會嘅貢獻。獲頒院士嘅名人包括有太子珠寶鐘錶主席鄧鉅明、中電副主席阮蘇少湄、昌利（控股）創辦人歐雪明、嘉利美商（集團）執行董事林李婉冰、傑出工業家孫國華、富豪酒店國際控股執董楊碧瑤、富士高實業控股創辦主席楊志雄同醫院管理局港島東醫院前聯網總監任燕珍。
歐雪明（左起）、林李婉冰、孫國華同鄧鉅明齊齊獲理大頒授院士榮銜。
首次獲香港嘅大學頒發院士殊榮嘅鄧鉅明話非常開心，太太鄧宣宏雁同九十一歲嘅媽媽都有去打氣，佢話希望今後可以成為後輩嘅榜樣，多做公益事務，肩負社會責任，又話夜晚已經約好朋友一齊開派對慶祝。林李婉冰亦有家人捧場，二仔林嘉傑原來仲喺理大讀緊設計碩士課程添，但囡囡就喺英國讀緊書所以嚟唔到，佢話三月打後就會飛過英國探囡囡喎！
至於同理大合作研發環保電動車嘅孫國華就話好榮幸獲頒院士，雖然電動車喺香港未係非常普及，但佢對香港市場好樂觀，又相信香港係一個重品味、有創意同價值嘅社會，環保將是未來政策大方向，所以唔擔心電動車嘅發展。
