呢排城中名人都忙於辦年貨，迎接農曆年嘅來臨。地產界女強人Marie胡幗英都唔例外，尋日趁年廿九同囡囡Valerie去到維園行花市，原來囡囡已十二年唔喺香港過年，所以Valerie對花市內各式各樣嘅貨品都大感興趣，尤其係特色小食，例如麥芽糖夾餅，大讚好食，佢哋仲喺花市遇到財神，當然即刻捉住財神合照，沾番啲財氣吖嘛！

胡幗英（左）與囡囡喺花市遇到財神，梗係要影番張合照啦。

Marie話囡囡已有男友，唔使催桃花。

Valerie對花市內各式貨品都感興趣，尤其係特色小食。

女兒有拖拍 唔使催桃花

咁使唔使買棵大桃花幫囡囡催吓桃花運？原來肖馬嘅Valerie已行桃花運，喺倫敦有男朋友嘞，但Marie話過年前喺屋企都有擺放桃花，仲有桔、蘭花同水仙等，將家居變成花園一樣。

Marie又話：「有年喺花農度訂咗棵桃花，年廿八未到已經開晒，於是無畀水，以為可以長得慢啲，點知一夜冇晒花，於是喺花市再買另一棵，點知買番嚟一打開張紅紙，全部花散落，後尾好好彩，年三十都畀我喺花農度買到棵好靚嘅桃花，一年買三棵桃花真係經典。」

萬事俱備，但佢同女兒會喺農曆年到韓國旅行，所以一家人已提早食過團年飯，呢餐團年飯好大陣仗，要喺六日前準備，由佢親自下煮炮製鮑魚花膠，屋企人食到津津有味。

第一手消息請下載on.cc東網iPhone/iPad/Android/Windows Phone Apps