仲記得行政會議同立法會「九男女」議員舊年接受航空公司款待豪遊法國風波，引起公眾質疑係咪存在利益衝突。立法會早前諮詢議員係咪應該收緊利益申報制度，而立會議員個人利益監察委員會尋日討論相關調查嘅結果，喺申報海外訪問利益方面，秘書處就諮詢議員係咪唔同意喺申報個人利益時，填寫埋估計獲贊助嘅款額，點知得二十位議員同意，唔同意嘅就有三十五位咁多，冇意見嘅就有三位，而白鴿黨、工黨同教育界議員葉建源就連表態都費事。

設計圖片及對白

咪以為唔表態就代表冇意見，根據秘書處收回嘅問卷顯示，白鴿黨六位議員包括有份豪遊法國嘅「鐵頭仁」何俊仁同涂謹申就話，要議員申報贊助嘅估值係有難度，估低咗又會被公眾質疑，所以不如淨係簡單申報住宿、交通同飲食安排就算。而同樣有接受款待嘅會計界梁繼昌都話，要佢哋估計贊助款項喺現實上好難執行喎！咁擺明係嚴人寛己啫！

有委員就建議議員可申報埋乘搭航班嘅座位同入住酒店嘅級數，或者外訪後再申報都好過唔報。但都有份豪遊法國嘅委員會主席葉國謙決定，應該根據議員意見作修訂，所以最後修訂嘅申報表格只係係咁意加咗項「參加訪問的理由」就算。證明班議員根本唔想收緊利益申報機制，無視公眾質疑佢哋存在利益衝突嘅問題。

第一手消息請下載on.cc東網iPhone/iPad/Android/Windows Phone Apps